moni kala ko jogii koo tan rokkirta.

moni kala ko jogii koo tan rokkirta. 

koddigal ina wela haa ɓura jiidigal welde ɓura cehilaagal welde, ɓura kadi jaadigal welde. kono so fellitii mettude, luural naatii e hakkunde hoɗdiiɓe ena nawora ko heewi famɗaani. 

kono kadi yahde de gooto e wonnde gooto no way fof, ɓuri jaadiiɗo bonɗo ɓuri koddiiɗo bonɗo. 

e jamaanuuji ɓooyɗi jawtuɗi eɗen mbaawi wiyde ɗi heewɓe hay siftoreede mun njiɗaa hoddiiɓe ɗiɗo,  jiiduɓe ko heewi famɗaani ko hay gooto waawa ustude waawa yeddude, waawa yawde. 

haɓe mbeldu noo, no feewi ko kamɓe nden-ndu noo huunde fof haydara ɓe njaɓataano lom-mboo hakkunde maɓɓe, haɓe njiidi haɓe mbeldi kadi haɓe kawri e fannuuji keewɗi. 

kono pulaar wiyi" Cehilaaal bonataa so tawii jamfa tawaaka. 

so tawii a yiɗaa yiyde e neɗɗo hono maa ko welaanima ko feewaanima  hoto yuurno ɗum nder e boowal sibu neɗɗo timmaani, so a yuurniima a yuurnitiima ɗum no feewi, mbele aɗa yiya e mun ko welaanima feewnitaakima tan Jooni njiyaa ko ndaaran-no ɗaa taw alaa fof ko ɗum ɓeeydata hakkunde mon so wonaa ko ɗum bonni walla ko ɗum jiiɓi, sibu ena usta hoolaare kala to hoolaare gasi famɗat ko hedii ɗoon. 

Ndeen ɓe njehii ɓe ndewii luural hakkunde maɓɓe haa ko moƴƴu noo hakkunde maɓɓe fof yooli. 

ɓe pelliti seertude fof, e seerndude fof alaa koɓe ngoppi hakkunde maɓɓe, sibu hay gooto e maɓɓe sikkaani mi jaaki, wonnde hannde ene niɓɓiɗi hakkunde maɓɓe kono janngo fof ene waawi wontoyde no wanoo hanki nih. 

Ko noon koddigal maɓɓe boniri. 

Gooto fof heɓi hoore mun rewi e tiinde mun. Wonɓe baŋnge funnaange ɓee, mbaɗti innirde wonɓe hirnaange ɓee, hirnaange naaɓe, wonɓe hirnaange ɓee, kadi mbaɗti innirde ɓeya too funnaange naaɓe Balɗe lebbi e duuɓi ena jawta tan fof ena ɓeeydoo bonnde fof ena ɓeeydoo jiɓaade hakkunde maɓɓe. 

Waɗi sahaa gooto tan wonɓe hirnaange ɓee mbiyi ɓaadi jam alaa yo bone woot tan, ɓaadi kawral alaa yo luural woot tan, ɓaadi alaa fof ko moƴƴata hakkunde men e maɓɓe fof yo bon tan laawol gootol. 

ɓe ndenndini to maɓɓe, bone bonnɗo en kurjuru en ekn… haa heewi ɓe mbeddo yii ɗum to ɓeya ɓe ngarti ɓe njooɗii. 

wonɓe funnaange ngari jiimi heen njiili koye sibu ene nganndi alaa baɗoowo ɗe golle so wonaa kamɓe kono haydara kaalaani. 

Ndotti to mum’en ndenndi noy kala ko ɓurnoo yiɗde e ko ɓurnoo horsinde gila e ñaamdu haa e geɗe goɗɗe haa heewi, ndoondii  ngari haa ɓenni keerol hakkunde maɓɓe njoññini ɗoon mbinndi e dow heen 

« MONI KALA KO JOGII KOO TAN ROKKIRTA»