SO JEEWO BONII, GALLE BONII SO AFO BONII, GALLE BONII,

So jeewo bonii, galle bonii so afo bonii, feere bonii
Meeɗiino e sahaaji jawtuɗi, gorko gooto, ñawu heɓi mo. O jippii ndaɗɗudi. Yanti heen kadi o wumi.
Ɗo o jooɗinoo e ɓuuɓri huɓeere makko omo miijoo no nguurndam makko jogori wattinde sabu omo resi debbo cukayel ko ɓooyaani, omo tawri ɗum jeewo makko. Omo miijoo, omo miijoo, haa foondu mariyaama ena doga ndaddo, yettii, sorkii e nder wutte makko.
Ndaddo yettii oo, wi’i mo : “Rokku am foondu nduu, mi wumtin maa !”
Foondu nduu ne wi’i mo : “Daɗndu am, mi artira ngoraagu maa !”
Gorko oo aani sabu omo yiɗi waɗtude yi’de, tee omo yiɗi ne ngoraagu makko arta. O noddi jeewo makko oo, o habri mo ko foondu nduu e ndaddo oo kaali koo. O naamnii mo hol ko woni heen miijo makko.
Debbo jeewo oo naywii, tee gorko oo ena wa’i no nattii waalde to mum. E kiram mum debbo sukaajo oo, owi’i gorko oo : ”Gite kay ɓuri wonde hannde ko potɗaa ndaartude, sabu ko gite nji’ata, kersata.”
Gorko oo wi’i mo : “Mi nanii haala maa. Noddan am Hammadi, ɓiɗɗo men afo oo.”
Hammadi ari, yumma yahi. Baaba oo habri mo ko foondu nduu e ndaddo oo kaali koo. Hammadi wi’i : “Baaba, muñan am mi ara.”
Hammadi fa’i ñaandeeji, tuufnii toon pooli, jaggi heen wooturu. O moofti, o addi ndu, o wi’i baaba oo : “Ndah nduu ɗoo foondu, ndokken ndu ndaddo oo yaha, o ñaamoya, ndaddo oo artira gite maa. So o yahii, ɗaccen foondu riddanoondu nduu, nduun ne artira cellal maa.”
Ɓe mbaɗi feere afo fewji ndee. Ndaddo oo ƴetti foondu ndu tottaa nduu ñaamoyi ; foondu ne dogi, daɗi e bone ndaddo. Foondu nduu e ndaddo oo fof mbaɗi ko mbi’noo koo woni artirde cellal makko. Ndeke ko feere afo heɓɓitii baaba oo.
Ɗuum addani haaliyaŋkooɓe Fulɓe wi’de : So jeewo bonii, galle bonii. So afo bonii, feere bonii.